КОНДАК 1
Избранному от обители Печерския, страны вятичей просветителю, похвальное приносим пение. Ты же, яко велий учителю наш и заступниче, моли Христа Бога да избавит страну нашу от бед и напастей, и утвердит ны в Православии и вере, да любовию вопием ти: Радуйся, священномучениче Иоанне Кукше, просветителю страны нашея.
ИКОС 1
Ангелов Творец посла тя из обители Печерския в страну нашу, да просветиши людие седящия во тьме и сени смертней, и наставиши заблудшия во тьме язычества. Ты же пришел если к нам, великий угодниче, верою Христовою, яко камением многоценным, украшая страну нашу. Темже просвещении верою и в ней утверждении, любовию вопием ти сице:
Радуйся, светило пресветлое, лучами своими осиявающее великую Россию;
Радуйся, честный воине Христа Бога, мрак неверия усердно прогоняющий;
Радуйся, чудотворче предивный, твоими чудесы всех удививый;
Радуйся, столпе Церкве Христовой, на подкрепление нам от Бога уготованный;
Радуйся, яко тобою научихомся поклонятися Творцу в Троице;
Радуйся, священномучениче Иоанне Кукше, просветителю страны нашея.
КОНДАК 2
Видев Господь страну нашу во тьме сущую и языческою мглою погубляемую, посла тя, преподобне, из обители Печерския, да будеши людем наставник, учитель и пастырь, и всех приведеши к Богу, зовущих: Аллилуиа.
ИКОС 2
Разум богопросвещенный твой видящее жители страны нашея, вятичи именуемыя, схождахуся к тебе и поучахуся словесем твоим и подвигом, крещение от тебе приемляху. Мы же от оных восприемше Веру православную, восхваляем тя вопиюще:
Радуйся, наставниче предивный, возведый нас к познанию Христа Бога;
Радуйся, великий учителю, научивый люди страны нашея православной вере;
Радуйся, пресветлый светильниче, тьму неведения и злочестия разсеявый;
Радуйся, пастырю добрый, приводяй словесное стадо к небесным пажитем;
Радуйся твердый кормчий корабля Иисусова, от волн греха и страстей спасаяй нас;
Радуйся, священномучениче Иоанне Кукше, просветителю страны нашея.
КОНДАК 3
Сила Божия осени тя, отче Кукше, многими чудесы в стране нашей православив тя: бесы прогнал еси, дождь с небесе свел если, езеро изсушил еси и иныя различныя дивныя чудеса сотворил еси. Темже людие, видевшее вся сия, воспеша прославльшему тя Богу: Аллилуиа.
ИКОС 3
Имея воистину, преподобне Кукше, великий дар чудотворений от Христа Бога к вечному спасению люди привел еси, велия чудеса и знамения творя, да вси узрят силу Божию, в немощи совершаемую, и оставльше тьму языческаго нечестия навыкнут славити тя сице:
Радуйся, чудотворче изрядный, дарованный нам от Бога;
Радуйся, попечителю о спасении душ человеческих, чудесами нас удивляй;
Радуйся, кормителю сирых, дождь с небесе чудесно низведый;
Радуйся, спасителю дивный, молитвами твоими бесы прогнавый;
Радуйся, помощниче труждающихся, силою Божиею езеро изсушивый;
Радуйся, священномучениче Иоанне Кукше, просветителю страны нашея.
КОНДАК 4
Бурею злобы и неистовства дышузе нечестивии служителие бездушных идолов, воздвигоша гонения на тя, преподобне отче, мнящее дело твое уничтожити и веру Христову истребити. ТЫ же и в страдании твоем воспел если дерзновенно Богу: Аллилйиа.
ИКОС 4
Слышавшее дерзновенную проповедь Евангелия и видевшее богоугодное житие твое, невернии людие мечем усекнуша тя с блаженным ти учеником. Мы же, почитая твоя за Христа страдания, просим твоея помощи и заступления: утверди нас в вере, угодниче Христов, за Возлюбившаго всех кровь свою проливый:
Радуйся, исповедниче православныя веры, неверныя обличаяй;
Радуйся, пастырю добрый, душу свою положивый за словесное стадо;
Радуйся, наше прибежище в годину скорби и печали твоими страдании нас укрепляй;
Радуйся, честная главо, главу свою за веру положивый;
Радуйся, священномучениче Иоанне Кукше, просветителю страны нашея.
КОНДАК 5
Боготечная звезда явился еси, преподобне Кукше, приводя к Горнему Иерусалиму всех тя послкшающих. Твоими бо ученьми наставляеми навыкохом воспеват и единому истинному Богу: Аллилуиа.
ИКОС 5
Видевшее подвиги твоя в научении людей истине Христовой, мнози последоваху стопам твоим и тако скинии благодати умножахуся в стране нашей, правоверныея людие тамо воспевают тя сердцы и усты:
Радуйся, храме Духа Святаго, всех верных озаряй благодатию;
Радуйся, страны нашея украшение, души верных веселящее;
Радуйся, звездо пресветлая, указующая всем путь к Небесным обителем;
Радуйся, апостолов достойный преемниче, своими труды обративый ко Христу люди заблудшия;
Радуйся, мучеников честный подражателю, своею кровию запечатлевый проповедь Евангелия Христова;
Радуйся, священномучениче Иоанне Кукше, просветителю страны нашея.
КОНДАК 6
Проповедник любве Христовы был еси, блаженнее Кукше,в сем житием твоим являя нам образ чистоты, смирения и кротости. Научи и нас сим добродетелем, преподобне да с тобою воспеваем возлюбшему тя Богу: Аллилуйиа.
ИКОС 6
Возсия стране нашей свет богоугоднаго жития твоего, преподобне отче, сего ради подаеши молитвами твоими чтущим тя милости неизреченныя: болящим – исцеление, скорбящшим – утешение, плачущим – радование, да вси людие прославляют тя, дивнаго во святых Божиих:
Радуйся, путеводителю предивный, приводяй к свету неверныя;
Радуйся, тишину Христову паче всего мира возлюбивый;
Радуйся, утешителю печальных, в скорбех и бедах и напастех всем нам помогаяй;
Радуйся, врачу скорый и безмесдный, туне исцеляй болезни душевныя и телесныя;
Радуйся, показавый нам образ любве, милосердия и всепрозения;
Радуйся, научаяй нас терпению, кротости и послушанию;
Радуйся, священномучениче Иоанне Кукше, просветителю страны нашея.
КОНДАК 7
Хотя люди страны нашея утвердити в православной вере и привести к вечному спасению, не убоялся еси страданий и смерти за Христа Бога нашего, но вземши Крест Его, яко знамя победное, усердно взывал еси: Алилуиа.
ИКОС 7
Новую благодать Христа Спасителя нашего восприяша людие страны вятичей, егда возвестил еси им путь спасения, темже и прославиша тя, дивнаго во святых Божиих и возопиша ти таковая:
Радуйся, ревностный поборниче Православия, к вере приводяй неверныя;
Радуйся, неустрашимый воине Христа Бога, крестом побеждаяй враги спасения нашего;
Радуйся, неизменный хранителю благодати и истины, Святым Крещением просветивый страну нашу;
Радуйся, мудрый наставниче в неведении и заблуждении страждущих;
Радуйся, нас любящих и чтущих тя спасаяй твоими молитвами;
Радуйся, священномучениче Иоанне Кукше, просветителю страны нашея.
КОНДАК 8
Странно и безумно показалося учение твое людем страны нашея, егда проповедал еси им Христа Бога, пострадавшего ради спасения людей на кресте и воскресшаго из мертвых. Слово бо кресное погибающим юродство, а спасаемым нам сила Божия есть, вопиющим: Аллилуиа.
ИКОС 8
Вся страна наша освятися подвиги и страдании твоими, страстотерпче Христов. Кто бо исчислит лишения и борения твоя, яже за Христа подъял еси, егда восташа на тя жрецы бесовстии и оклеветаша тя, предавшее мукам за имя Христово. Мы же, припадая к честному образу твоему, умиленно взываем ти:
Радуйся, витие богопросвещенный, твоими словесы посрамивый языческая учения;
Радуйся, ревностный проповедниче истины, идольскую лесть обличивый;
Радуйся, твердый хранителю догматов и нам помогаяй противостояти еретическому суемудрию;
Радуйся, пастырей Церкве подвизаяй на проповедание Слова Божия;
Радуйся, верный путеводителю всех в Царство Света невечерняго;
Радуйся, твоею кровию напоивый ниву Христову и возрастивый плоды добродетели;
Радуйся, священномучениче Иоанне Кукше, просветителю страны нашея.
КОНДАК 9
Всякия напасти и скорби избави нас, угодниче Божий, се бо грех ради наших скорби и болезни обыдоша нас, несть мира в костех наших и исчезает дух терпения, кротости и всепрощения, да с любовию вопием Господу Спасителю нашему: Аллилуиа.
ИКОС 9
Вития многовещанный показася блаженный Пимен, егда посреде церкве Печерския возопи велегласно: брат наш Кукша в сей день противу света убиен есть, и сия рекши, чистую душу свою Богу предаде, нас же научи пети тебе сице:
Радуйся, звездо светлая, во тьме жизни нам светящая;
Радуйся, заре светозарная, прогоняющая тьму искушений и бед;
Радуйся, на заре возсияый твоими страдании;
Радуйся, Пимена блаженного подвигнувый на проречение;
Радуйся, вкупе с ним возшедший во обители Отца Небеснаго;
Радуйся, помощниче наш в час смерти нашея;
Радуйся, священномучениче Иоанне Кукше, просветителю страны нашея.
КОНДАК 10
Спасти хотя от прелести бесовския страну нашу, оставил еси святую обитель Печерскую, возложив все упование на Матерь Божию, несокрушимую стену и прибежище верных. По блаженней же кончине твоей возвратился еси паки во святую обитель, идеже мощи твоя сияют чудесы многими, подвизая верных воспевати Единому Богу: Аллилуиа.
ИКОС 10
Стену нерушимую обрел еси, преподобне, Пречистую Матерь Божию, имея Ю заступницу и дивную путеводительницу, прошел еси всю страну нашу с проповедию Евангелия и по смерти твоей возвратился еси во обитель Печерскую, идеже и погребен был еси. Мы же, поклоняющееся честным мощем твоим, прославляем тя сице:
Радуйся, верный служителю Пресвятыя Богородицы, помощию Ея укрепленный;
Радуйся, предивное украшение обители Печерския, телом и духом в ней вечно пребывая;
Радуйся, радосте монахов и утешение в мире скорбящих;
Радуйся, заблудших и падших возвращаяй в объятия Отча;
Радуйся, юным подаваяй смысл к учению слова Божия;
Радуйся, и нас недостойных не оставляй твоими молитвами;
Радуйся, священномучениче Иоанне Кукше, просветителю страны нашея.
Радуйся, священномучениче Иоанне Кукше, просветителю страны нашея.
КОНДАК 11
Пение усердное приносим тебе, великий угодниче Христов, священномучениче Кукше, просим и молим тя; прими наша недостойныя молитвы в похвалу тебе возносимыя и даждь нам силы, да последуем стопам твоим во исповедании Веры православныя и научи нас крепко, даже до смерти стояти за славу имени Божия и воспевати: Аллилуиа.
ИКОС 11
Светоприемная свеща истиннаго света явися нам память твоя, преподобне Кукше, сего ради прославляет тя страна наша, яко ст=родника нашего по плоти и единоплеменника. Ты же прими от нас, недостойных, песнь сию:
Радуйся, града нашего честный покровителю и сродник твоих по плоти просветителю;
Радуйся,учителю наш и заступниче, в годину скорби терпению нас научаяй;
Радуйся, молитвенниче за немощных и падших, Христа Бога умилостивляй;
Радуйся, щите твердый, имже мы защищаемся от нападений вражиих;
Радуйся, всех объемляй твоею любовию;
Радуйся, твоим честным образом присно с нами пребываяй;
Радуйся, священномучениче Иоанне Кукше, просветителю страны нашея.
КОНДАК 12
Благодати Божественныя сосуд был еси, преподобне, из негоже напаяеши всех нас учением, мудростию и добродетелию, да вси почитающии тя имут радость вечную в Царствии Христовом, идеже ты со Ангелы поеши: Аллилуиа.
ИКОС 12
Поющее подвиги твоя и страдания, хвалим тя, преподобне отче Кукше и усердно вопием ти; о, великий наш учител.ю и наставниче в вере православной, прими, яко убогий дар, песнь сию, приносимую тебе:
Радуйся, апостоле страны нашея, просветивый нас верою;
Радуйся, добрый наш пастырю, защищаяй стадо твое от волков лютых;
Радуйся, святителей Божиих бодрость и укрепление;
Радуйся, иереев похвало и радование светлое;
Радуйся, смиренных иноков вразумление и тихое веселие;
Радуйся, путеводителю всех людей в Царство Истины и благ вечных;
Радуйся, священномучениче Иоанне Кукше, просветителю страны нашея.
КОНДАК 13
(читается трижды)
О, преславный угоддниче Христов, священномучениче Кукше, прими малое сие моление наше и твоим мвятым предстательством избави нас от всяког зла, и в годину скорби даждь нам силу дерзновенно исповедати святую Православную веру, и в час кончины нашея буди нам помощник и утешитель, да поем прославльшему тя Богу: Аллилуиа.
ИКОС 1
Ангелов Творец посла тя из обители Печерския в страну нашу, да просветиши людие седящия во тьме и сени смертней, и наставиши заблудшия во тьме язычества. Ты же пришел если к нам, великий угодниче, верою Христовою, яко камением многоценным, украшая страну нашу. Темже просвещении верою и в ней утверждении, любовию вопием ти сице:
Радуйся, светило пресветлое, лучами своими осиявающее великую Россию;
Радуйся, честный воине Христа Бога, мрак неверия усердно прогоняющий;
Радуйся, чудотворче предивный, твоими чудесы всех удививый;
Радуйся, столпе Церкве Христовой, на подкрепление нам от Бога уготованный;
Радуйся, яко тобою научихомся поклонятися Творцу в Троице;
Радуйся, священномучениче Иоанне Кукше, просветителю страны нашея.
КОНДАК 1
Избранному от обители Печерския, страны вятичей просветителю, похвальное приносим пение. Ты же, яко велий учителю наш и заступниче, моли Христа Бога да избавит страну нашу от бед и напастей, и утвердит ны в Православии и вере, да любовию вопием ти: Радуйся, священномучениче Иоанне Кукше, просветителю страны нашея.
Молитва священномученику Кукше
Святы́й страстоте́рпче священному́чениче Ку́кше, соверши́вый по́двиги апо́стольския посреде́ обита́ния соплеме́нник твои́х, на́ших пре́дков, и́хже ты просвеща́л еси́ све́том и́стиннаго богопозна́ния и по да́нней ти благода́ти Ду́ха Свята́го бе́сы прогна́вый, дождь с небесе́ своди́вый, е́зеро изсуши́вый и сотвори́вый и́на мно́га чудеса́, запечатле́в многострада́льный свой по́двиг му́ченическою кончи́ною! Приими́ от нас усе́рдныя и умиле́нныя моли́твы и вознеси́ я́ ко Престо́лу Святы́я Тро́ицы, иде́же ты в ли́це святы́х предстои́ши, я́ко да твои́м хода́тайством Ми́лостивый Госпо́дь утверди́т в ми́ре, си́ле и сла́ве страну́ Росси́йскую, в ча́дех же Святы́я Правосла́вныя Це́ркве да укрепи́т дух ве́ры и благоче́стия, в па́стырех ея́ да усугу́бит ре́вность к назида́нию пасо́мых и да при́зрит ми́лостивным о́ком на лю́ди предстоя́щия и прибега́ющия ко твое́й по́мощи. Ей, святы́й уго́дниче Бо́жий! Ве́мы, я́ко ве́лиих ра́ди страда́ний твои́х мно́го мо́жет моли́тва твоя́ ко благосе́рдию Влады́ки. Сего́ ра́ди, я́ко ча́да твоя́ по ве́ре, припа́дающе к ра́це честны́х и многоцеле́бных моще́й твои́х, дарова́нных по всеблаго́му промышле́нию Бо́жию и по благослове́нию первоиера́рха Ки́евския Це́ркве в на́ше освяще́ние и в зна́мение твоего́ о нас заступле́ния, мо́лим тя в ду́се сокруше́ннем и смире́ннем: не пре́зри моле́ний на́ших, излива́емых пред тобо́ю, и вознеси́ я́ ко Всеще́дрому Бо́гу, я́ко кади́ло благово́нное, да твои́м хода́тайством вы́ну почи́ет благода́ть Его́ на гра́де сем, в не́мже чти́тся пресла́вное и́мя твое́, и лю́ди, живу́щие в нем, да сохраня́тся от гла́да, огня́, смертоно́сныя я́звы и напра́сныя сме́рти, от вся́ких бед и напа́стей. Споспе́шествуй, священному́чениче Ку́кше, святы́ми твои́ми моли́твами честно́му бра́тству свята́го хра́ма сего́, да приумно́жится сие́ и процвета́ет во сла́ву Триеди́наго Бо́га, в похвалу́ твоего́ и́мене, и во бла́го Святы́я Правосла́вныя Це́ркве, да та́ко вси, охраня́еми твои́м предста́тельством, ми́рно и благоче́стно поживу́т, сла́вяще и благодаря́ще Еди́наго И́стиннаго Бо́га во Святе́й Тро́ице сла́вимаго, Отца́ и Сы́на, и Свята́го Ду́ха. Ами́нь.
Тропарь, глас 3:
Му́ченическою кро́вию, свяще́нне Ку́кше,/ в про́поведи Ева́нгелия со ученико́м ти блаже́нным Ни́коном, че́стне украси́выйся,/ и Пи́мене, в по́стничестве светоза́рне просия́вый,/ в еди́н день и час внидо́сте в свет незаходи́мый,/ иде́же моли́теся Го́сподеви,// да пода́ст нам ве́лию ми́лость.
Кондак, глас 4:
Свети́ла разу́мная, соше́дшеся, хвала́ми воспое́м, лю́дие,/ просия́ли бо суть в ми́ре сем:/ Пи́мен мно́гими по́двиги,/ Ку́кша же со ученико́м Ни́коном про́поведию Сло́ва,/ и си́и трие́, единоу́мно предстоя́ще Святе́й Тро́ице,/ я́ко со́лнце сия́ют и просвеща́ют// любо́вию па́мять их восхваля́ющих.
ВЕЛИЧАНИЕ
Величаем тя, священномучениче Кукше, и чтим честная страдания твое, яже за Христа претерпел еси.
Кто приобрел похвальное дело молитвы, тот приближается к Богу и избегает бесов.
– Преподобный Иоанн Лествичник. Лествица или скрижали духовные. СЛОВО 19.